ئه‌گه‌ر ئه‌مجاره بێمه‌وه
په‌شێو
---------------------
ئه‌گه‌ر ئه‌مجاره بێمه‌وه
به‌یانییان،
وه‌ك به‌رخۆڵه‌یه‌كی ساوا،
له‌ناو قه‌رسیلی پاراوا
تل ده‌خۆم و
گیایه‌كی تفت... تێرتێر ده‌جووم،
تا كفت ده‌بم،
پێ و به‌له‌كم
له شه‌ونمی سارد هه‌ڵده‌سووم!
* * *
ئه‌گه‌ر ئه‌مجاره بێمه‌وه:
وه‌ك سمۆره،
به دارگوێزه به‌رزه‌كانا هه‌ڵده‌گه‌ڕێم،
وه‌ك په‌ڵه‌یه‌ك هه‌وری نه‌وی
به‌سه‌ر كێڵگه سه‌وزه‌كانا ده‌خولێمه‌وه،
وه‌ك شه‌نگه‌بی
به‌سه‌ر چه‌ما،
به‌سه‌ر گشت زناره‌كانی
كه‌نارا ... ده‌چه‌مێمه‌وه
ئاخ، به‌س ئه‌مجاره بێمه‌وه!
* * *
ئه‌گه‌ر ئه‌مجاره بێمه‌وه:
سه‌رنج ده‌ده‌م
گوڵه‌گه‌نم چۆن زه‌رد ده‌بێ،
هه‌نار و سێو چۆن پێ ده‌گه‌ن،
قه‌تێیه‌كان
هێلانه‌یان چۆن چێ ده‌كه‌ن!
سه‌رنج ده‌ده‌م،
زه‌ڕنه‌قووته چۆن باڵ ده‌گرێ،
په‌ڕه‌سێلكه كۆچه‌ره‌كان،
له‌سه‌ر تێلی كاره‌بای ڕێ،
چۆن ڕیز ده‌بن،
جۆگه‌له‌كان له كوێوه دێن،
بۆ كوێ ده‌چن!
* * *
ئه‌گه‌ر ئه‌مجاره بێمه‌وه:
له گۆی مه‌مكی هه‌ر كانییه‌ك
قومه‌ئاوێك ده‌خۆمه‌وه،
گشتیان ده‌كه‌م به دایكی خۆم.
له هه‌ر ئه‌شكه‌وتێكا، شه‌وێك
سه‌ر به گاشه‌به‌ردێك ده‌كه‌م،
گشتیان ده‌كه‌م به لانكی خۆم.
* * *
ئه‌گه‌ر ئه‌مجاره بێمه‌وه:
زمانی گڕ ده‌هێنمه‌وه بۆ لاڵه‌كان.
شاپه‌ڕی گڕ ده‌هێنمه‌وه
بۆ فڕنده بێباڵه‌كان!
* * *
ئه‌گه‌ر ئه‌مجاره بێمه‌وه:
ناهێڵم لاوان گوڵ بچنن
بۆ گوڵدانی مردووی سه‌ر مێز.
فێریان ده‌كه‌م،
كه چوونه ژوان،
له به‌رۆكی كچانی ده‌ن،
پێش ئه‌وه‌ی بیانكه‌نه ئامێز!
* * *
ئه‌گه‌ر ئه‌مجاره بێمه‌وه:
- مناڵانی مۆسكۆی چاوشین فێریان كردووم -
بێ شیرینی
سه‌ر ناكه‌م به هیچ ماڵێكا،
زۆر جۆلانه‌ی نه‌رم و ساده
بۆ مناڵان هه‌ڵده‌به‌ستم.
له جه‌ژنی له‌دایكبوونیانا
- كه نیانه -
به‌شدار ده‌بم...
له‌باتی مۆم داده‌گیرسێنم ئه‌نگوستم.
گڕ به‌رده‌ده‌م
له گلێنه‌ی چاوه‌كانم،
له ساواترین هه‌ڵبه‌ستم.
* * *
ئه‌گه‌ر ئه‌مجاره بێمه‌وه:
هه‌ر بێشكه‌یێك بێته ڕێگه‌م،
به شێنه‌یی به سه‌ریا ده‌نووشتێمه‌وه.
ئاخ، مناڵان!
ئاخ، به‌س ئه‌مجاره بێمه‌وه.
16/5/1975 - مۆسكۆ
په‌شێو
